ஒப்பற்ற ஓவியமாகுபவன்

கவிந்து
திறந்து இயங்கும்
இரண்டு இமைத்தூரிகைகள்
தீட்டுகின்றன அவனை

அனுதினம்
பார்வைகளில் பெருகும்
வண்ணங்கள்
ஹேர் ஜெல் ஆகி
அவன் கேசத்தைத்தடவுகிறது
ஃபேர் அண்டு ஹேண்ட்சம் ஆகி
அவன் கன்னக்கதுப்புகள் உட்பட
வருடுகிறது
நிறம் நிறமாய்
டி ஷர்ட், காட்டன் பேன்ட்கள்
அவனுடலைத்தழுவுகின்றன

ரெண்டு கை, கால்கள்
ஒரு முகம்
இன்னபிறவாக
சராசரி சதைப்பற்றாயிருந்தவன்
ஆகிக்கொண்டிருக்கிறான்
அவள்வரையில்
ஒப்பற்ற ஓவியமொன்றாக.

எரியும் ஒரு மெழுகுவர்த்தியை

எரியும் ஒரு மெழுகுவர்த்தியை
பற்றிக்கொண்டு
என்னென்ன செய்ய
இருளை அகற்ற
சுடர் பார்த்து தியானித்திருக்க
பிறந்தநாள் கொண்டாட்டத்தில்
ஊதியணைக்க
கர்த்தரை பிரார்த்திக்கையில்
ஒளிசெய்யவிட
உருகவுருக அதையொரு
கவிதையில் வைப்பதைத்தவிர

உயரத்தில்
மேல்நோக்கியேயெரியும்
மெழுகுவர்த்தியை
கிடைமட்டமாய்க்கிடத்திய
கண்ணாடித்துண்டொன்றின் பரப்பில்
நடுகிறேன்
அதே தளிர் நெருப்பை
ஆழத்தில்
கீழ் நோக்கி எரியவிடுவதன்
சாகசமாக.

தோற்றப்பிழை

என் கால்களையே
சுற்றிச்சுற்றி வருகிறது
நாய்க்குட்டி போல
கடல்
கரையை தாண்டிவிட்டவன்
திரும்பிப்பார்க்கிறேன்
காதுகள் விடைத்து
கால்களால் தாவித்தாவி
என்னுடன்
வர யத்தனிக்கிறது
அக்கரையில்
கட்டிவைக்கப்பட்டிருக்குமிந்த
நாய்க்குட்டி

வயிற்றுக்கு

வெளி குறித்த
பிரக்ஞையேயில்லை
சீட்டைத்தேர்வதில்
முனைந்திருக்கிறது கிளி

பறத்தலும்
கடத்தலும்
அலைதலும் எதற்கோ
எஜமானன் இடுவானில்லையா
வயிற்றுக்கு
நெல்மணி.

அழைப்பு:

 

இணைய தளத்தில் இலக்கியத்துக்கான இணைய இதழ்கள் மற்றும் படைப்பாளிகளே நிறுவிக்கொள்ளும் வலைப்பூக்களின் ஆதிக்கம் அதிகரித்திருக்கிற இந்நாட்களில் அச்சு இதழ், குறிப்பாக, சிற்றிதழ் நடத்துவதென்பது ஒரு இதழாசிரியர் எதிரேயிருக்கிற மிகப்பெரிய சவால்தான். என்றாலும், சிற்றிதழ்களுக்கான மதிப்பு, தேவை என்பவை இல்லாமலுமில்லை.

அந்தவகையில், நண்பர் இயற்கைசிவம் அவர்கள், தான் ஆசிரியராயிருந்து ஆரம்பிக்கவிருக்கும் இலக்கியச்சிற்றிதழ் வெயில்நதி வருகிற 'மே' மாதம் முதல் (இரு மாதத்துக்கு ஒருமுறை) வெளிவரவிருக்கிறது.

நவீன கவிதைகள், புதுக்கவிதைகள், கட்டுரைகள், சிறுகதைகள், மொழிபெயர்ப்பு கவிதைகள் கதைகள், படைப்பாளுமைகளின் நேர்காணல்கள் என உங்களின் வாசிப்பனுபவத்தை மேலும் சிலிர்க்கச் செய்வதான இந்த முயற்ச்சியில், படைப்புகள், சந்தாக்கள், தோழமைகள் சகிதம் பங்கேற்று வெயில்நதி-யை சிறந்த இலக்கியச்சிற்றிதழாக்க அன்போடு அழைக்கிறோம்!

இரு திங்கள் தனிச்சுற்று இதழாக, ரூபாய் 15 /-
ஆண்டு சந்தா ரூபாய் 90/-
இரு ஆண்டுகள் சந்தா ரூபாய் 170/-

அனைத்து தொடர்புகளுக்கும்:

இயற்கைசிவம் - ஆசிரியர், வெயில்நதி. 
எண் :- 1 டி, சந்தை மேடு, சிருகடம்பூர், செஞ்சி - 604202,

விழுப்புரம் மாவட்டம், தமிழ் நாடு, இந்தியா.
கைப்பேசி எண்கள் : 99411 16068 , 89409 62277,
மின்னஞ்சல் முகவரி : veyilnathi@gmail.com

(படைப்புகளை அஞ்சல் மற்றும் மின்னஞ்சலிலும், சந்தாவை MO மூலம் மேற்கண்ட முகவரிக்கும் அனுப்பி வைக்கலாம்)